വിദ്യാഭ്യസ രംഗത്തും ശ്രദ്ധേയമായ പങ്കുവഹിച്ച പ്രദേശമാണ് അഴീക്കോട്. വിദ്യാഭ്യാസ രംഗത്തെ ഉച്ചനീചത്വങ്ങള് ഇല്ലായ്മ ചെയ്യാന് പ്രവര്ത്തിച്ച പെരുമാക്കല് കേളു എഴുത്തച്ഛന്, പൊന്മഠത്തില് കൃഷ്ണ സ്വാമി, എ കെ നായര്, എം ടി കുമാരന്, വേശാല സ്വാമികള് എന്നിവരുടെ പ്രവര്ത്തനങ്ങളും അഴീക്കോടിന്റെ ഈ രംഗത്തെ പുരോഗതിക്ക് നിദാനങ്ങളാണ്. 1870 ലാണ് അഴീക്കോടിലെ ആദ്യത്തെ വിദ്യാകേന്ദ്രം കൊട്ടാരത്തുംപാറയില് പെരുമാക്കല് കേളു എഴുത്തച്ഛന് സ്ഥാപിച്ചത്. ആ സ്കൂള് ആണ് പിന്നീട് അക്ലിയത്ത് സ്കൂള് എന്ന പേരില് വന്കുളത്ത് വയലില് സ്ഥാപിച്ചത് . മത്സ്യതൊഴിലാളികളുടെ മക്കള്ക്കായുള്ള ഗവ: റീജീയണല് ഫിഷറീസ് ടെക്നിക്കല് ഹൈസ്കൂള് 1969 ല് അഴീക്കലില് സ്ഥാപിക്കപെട്ടു. വിദ്യാഭ്യാസ രംഗത്ത് ജനകീയ ഇടപെടലുകളും ഉണ്ടായിട്ടുണ്ട്. ശമ്പളം കൊടുത്തും കെട്ടിടങ്ങള് ഉണ്ടാക്കിയും ജനങ്ങള് തന്നെ നടത്തിയ സ്കൂളാണ് അഴീക്കോട് ഈസ്റ്റ് എല് പി സ്കൂള്.ഇപ്പോള് പലകാലത്തായി സ്ഥാപിക്കപെട്ട 16 സ്കൂളുകള് ഈ പഞ്ചായത്തിലുണ്ട്. രണ്ട് ഗവ: ലോവര് പ്രൈമറിയടക്കം 9 ലോവര് പ്രൈമറി സ്കൂളുകളും,നാല് പ്രൈവറ്റ് യു പി സ്കൂളുകളും 2 ഗവണ്മെന്റ് ഹൈസ്കൂളൂകളടക്കം 3 ഹൈസ്കൂളുകളും.
സ്കൂളില് ഒരു പച്ചക്കറി തോട്ടം എന്ന ഉദ്ദേശത്തോടെ മാത്രം ആരംഭിച്ച ഒരു പദ്ധതി സ്കൂളിന്റെ തന്നെ മികവിന്റെ വഴിയായിത്തീര്ന്നു. അഴീക്കോട് നോര്ത്ത് യു.പി സ്കൂളിലെ ഹരിതവിദ്യാലയത്തിന്റെതാണ് ഈ നേട്ടം. ഇന്ന് സ്കൂളില് മികച്ച ഒരു പച്ചക്കറിത്തോട്ടത്തിന് പുറമെ വിദ്യാര്ത്ഥികളില് ഒരു കാര്ഷികാവബോധം വളര്ത്തിയെടുക്കാനും ഓരോ വിദ്യാര്ത്ഥിയുടെയും വീട്ടുമുറ്റത്ത് ഒരു പച്ചക്കറിത്തോട്ടം വളര്ത്തിയെടുക്കുന്ന രീതിയിലും എത്തിനില്ക്കുന്നു സ്കൂളിലെ ഹരിതവിദ്യാലയത്തിന്റെ നേട്ടം.
ജില്ലാ പുഷ്പഫല പ്രദര്ശനത്തിന്റെ ഭാഗമായി ജില്ലയിലെ വിദ്യാലയങ്ങള്ക്കായി സംഘടിപ്പിച്ച ഹരിതവിദ്യാലയം പദ്ധതിയുടെ ഭാഗമായി മികച്ച സ്കൂള് പച്ചക്കറിത്തോട്ടമായി അഴീക്കോട് നോര്ത്ത് യു പി സ്കൂളിനെ തിരഞ്ഞെടുത്തു. പുഷ്പപ്രദര്ശനത്തിന്റെ സമാപനത്തില് പ്രശസ്ത ബാലനടി സനുഷയില്നിന്ന് പ്രധാനാധ്യാപകന് കെ.രാജഗോപാലന് സമ്മാനം ഏറ്റുവാങ്ങി.
വിദ്യാഭ്യാസം 
